Dagskrá hafnasambandsþings, sem haldið verður á Snæfellsnesi 23.-24. september nk., liggur nú fyrir. Dagskráin er birt með fyrirvara um hugsanlegar breytingar.

Hafnasambandsþing verður haldið í Stykkishólmi dagana 23. og 24. september nk. Aðalviðfangsefni þingsins, auk hefðbundinna þingstarfa, er umfjöllun um fjármál hafna, endurskoðun hafnalaga, strandsiglingar og samskipti við viðskiptavini hafnanna. Dagskrá þingsins verður sett inná vef hafnasambandsins innan tíðar.

Sett hefur verið upp heimasíða fyrir Skagafjarðarhafnir.  Slóðin er http://hafnir.skagafjordur.is  Er meiningin að þar verði fréttir af því helsta er umleikis er á höfnunum, svo sem landanir, samantekt á löndunum ofl.  Þá er vakin athygli á veðurstöð sem staðsett er á hafnarhúsinu og gefur upp veður í rauntíma. Er hún undir „Tenglar“ veðrið á Sauðárkrókshöfn.

Þriðjudaginn 18. maí sl. var nýtt móttökusvæði fyrir ferðamenn af skemmtiferðaskipum ásamt nýrri flotbryggju vígt við hátíðlega athöfn í Grundarfjarðarhöfn.  Við athöfnina var gerð grein fyrir helstu kostnaðar og magntölum í framkvæmdinni sem samtals hefur staðið yfir í þrú ár. 

Þrátt fyrir erfiðan rekstur Reykjaneshafnar árið 2009 og skuldir sem nema um 5 milljörðum króna, mun eignastaða Reykjaneshafnar styrkjast fljótt, að sögn Péturs Jóhannssonar hafnarstjóra.

Vinna við úrbætur á móttökusvæði hafnarinnar fyrir skemmtiferðaskip gengur vel. S.l. mánudag var ný flotbryggja sjósett, og vinna stendur yfir við frágang og fegrun. Gert er ráð fyrir að aðstaðan verði orðin glæsileg þegar fyrsta skemmtiferðaskip sumarsins kemur.

Hornafjarðarhöfn hefur tekið í notkun nýja heimasíðu fyrir höfnina. Þar koma fram allar helstu upplýsingar um starfssemi hafnarinnar, starfsmenn hennar og hlutverk. Þá er á síðunni dagbók hafnarinnar þar sem fram kemur öll skipaumferð, landanir og helstu fréttir.

Grundarfjörður er nú fullur af síld og bæst hefur í dag frá degi. Heimildir Skessuhorns herma að ef miðað sé við fyrstu þykktarmælingar sé ekki undir hálfri milljón tonn af síld þar núna, sem er athyglisvert í ljósi þess að aðeins hafa verið leyfðar veiðar á 47.000 tonnum síðan í haust. Síldartorfurnar eru mjög þéttar og ná frá botni upp á yfirborðið og síldargangan nær alveg inn í Kolgrafarfjörð. Fuglinn tínir síld af sjónum og háhyrningar elta síldina upp undir fjörur. Ekkert má veiða því kvótinn er búinn og fiskifræðingar hafa haft vara á sér vegna sýkingar í síldinni.

Meðal tillagna nefndar samgöngu- og sveitarstjórnarráðherra um fjárhagsvanda hafna er að endurskoða þurfi hafnalög, verkaskipting hafna verði auðvelduð og úrelding gerð möguleg og að  eftirlitsnefnd með fjármálum sveitarfélaga verði falið að hafa sérstakt eftirlit með rekstri hafna.

Komin er út handbók um flutning á hættulegum farmi á vegum, svonefnd ADR handbók. Vinnueftirlitið gefur bókina út og er höfundur hennar Víðir Kristjánsson, deildarstjóri efna- og hollustuháttadeildar Vinnueftirlitsins. Handbókin er sett þannig upp að fyrst er fjallað almennt um reglur um flutning á hættulegum farmi á vegum, skilgreiningar, undanþágur, flokkun í hættuflokka og fleira. Þá er fjallað um pökkunarákvæði, fylgiskjöl, merkingu ökutækja og fleira og í viðaukum er fjallað um varúðarmerki, hættunúmer og fleira og um reglur um flutninga um jarðgöng.