Faxaflóahafnir voru með heildartekjur á árinu 2011 upp á 2,4 milljarða króna. Hagnaður ársins var 248 milljónir kr. Gísli Gíslason hafnarstjóri segir að miðað við fyrstu fjóra mánuðina stefni í góðan rekstur á þessu ári eftir mikla niðursveiflu frá árinu 2008.

Faxaflóahafnir eru í eigu Reykjavíkur, sem á 75% í fyrirtækinu, Akraness, Borgarness, Skorradalshrepps og Hvalfjarðarsveitar sem saman eiga 25%.

Gísli segir að verulega hafi dregið úr tekjum Faxaflóahafna í niðursveiflunni frá árinu 2008 en miðað við fyrstu fjóra mánuði þessa árs virðist sem talsverð aukning verði á tekjum fyrirtækisins.

Faxaflóahafnir hafa þróað land og lóðir fyrir iðnfyrirtæki á Örfirisey, Sundahöfn og á Grundartanga. Fyrirtækið hefur haft mun minni tekjur af þessum þætti starfseminnar eftir hrun en samt haft fjárfestingarkostnað af honum.

Gísli segir að fyrirtækið hafi á móti lækkað kostnað sinn og einnig hafa aflagjöld af fiskveiðiflotanum hækkað og aukið tekjur Faxaflóahafna.

Við erum komnir í svipað tekjuform og var hjá okkur fyrir fjórum árum. Síðastliðin þrjú ár hafa verið hvert öðru lík en það eru jákvæð merki á lofti núna. En það er of snemmt að tala um að kreppunni sé lokið.

Gísli segir að vöruinnflytjendur sé fyrr á ferðinni núna að flytja inn vörur. Innflutningur fyrstu fjóra mánuðina er meiri en á sama tíma í fyrra.

Gísli segir fjölgun á komu skemmtiferðaskipa skipta máli en þó ekki meginmáli í afkomu Faxaflóahafna. Langstærsti tekjuhlutinn er af vöruinnflutningi og landþróun. Hann segir hins vegar skemmtiferðaskipin mikilvæg að því leyti að koma farþega til landsins skipti miklu máli fyrir afkomu annarra fyrirtækja. Efnahagsáhrifin af komu skemmtiferðaskipanna séu mjög mikil.